आंतरराष्ट्रीय एकल महिला सन्मान दिन उत्साहात साजरा; शेकडो महिलांना विविध शासकीय योजनांचा लाभ
महाबळेश्वर, दि. 23 : तहसील कार्यालय महाबळेश्वर, पंचायत समिती महाबळेश्वर, महाराष्ट्र राज्य ग्रामीण जीवनोन्नती अभियान (उमेद) आणि महिला व बाल विकास विभाग (आयसीडीएस) यांच्या संयुक्त विद्यमाने आंतरराष्ट्रीय एकल महिला सन्मान दिनानिमित्त खादी ग्रामोद्योग मधसंचनालय, महाबळेश्वर येथे विशेष सक्षमीकरण कार्यक्रमाचे उत्साहपूर्ण वातावरणात आयोजन करण्यात आले. या कार्यक्रमात तालुक्यातील विविध ग्रामपंचायतींमधील एकल महिला, स्वयंसहाय्यता बचत गटांच्या सदस्यांसह ग्रामसंघ आणि प्रभाग संघाच्या पदाधिकारी महिलांनी मोठ्या संख्येने सहभाग नोंदविला.
महिलांच्या सामाजिक, आर्थिक आणि मानसिक सक्षमीकरणाला चालना देण्याच्या उद्देशाने आयोजित या कार्यक्रमाला तहसीलदार सचिन मस्के, गटविकास अधिकारी विजय विभुते, जिल्हा परिषद सदस्य संजय केळगणे, पंचायत समिती सभापती शकुंतला रमेश चोरमले, उपसभापती संजय मोरे, पंचायत समिती सदस्या वंदना प्रवीण भिलारे, पंचायत समिती सदस्य संजय शेलार, प्रवीण भिलारे, जिल्हा समन्वयक समिती सदस्य गणेश उतेकर, तालुका शिवसेना प्रमुख मंगेश संकपाळ (लाखवड) तसेच विविध विभागांचे अधिकारी, कर्मचारी आणि मान्यवर उपस्थित होते.
कार्यक्रमामध्ये महाराष्ट्र राज्य ग्रामीण जीवनोन्नती अभियानांतर्गत एकल महिलांचा स्वयंसहाय्यता बचत गटांमध्ये समावेश करून त्यांना सामुदायिक गुंतवणूक निधी (सीआयएफ) वितरित करण्यात आला. तसेच लखपती दीदी प्रमाणपत्रांचे वाटप करण्यात आले. उत्कृष्ट कार्य करणाऱ्या ग्रामसंघ आणि स्वयंसहाय्यता समूहातील महिलांचा यावेळी विशेष सत्कार करण्यात आला. विविध शासकीय योजनांतील पात्र लाभार्थींना मंजुरी आदेश व प्रमाणपत्रांचेही वितरण करण्यात आले.
यावेळी आयुष्मान भारत कार्डांचे वाटप करण्यात आले. तसेच संजय गांधी निराधार अनुदान योजना, श्रावणबाळ सेवा राज्य निवृत्ती वेतन योजना आणि सावित्रीबाई फुले बाल संगोपन योजना आदी विविध कल्याणकारी योजनांच्या पात्र लाभार्थींना मंजुरी आदेश प्रदान करण्यात आले. उत्कृष्ट कार्य करणाऱ्या अंगणवाडी सेविकांचाही यावेळी सन्मान करण्यात आला.
महिलांच्या आरोग्य संवर्धनाच्या दृष्टीने आयोजित करण्यात आलेल्या विशेष आरोग्य शिबिरात रक्तदाब, रक्तातील साखरेची तपासणी, हिमोग्लोबिन चाचणी तसेच इतर आवश्यक आरोग्य तपासण्या करण्यात आल्या. उपस्थित महिलांनी या आरोग्य सुविधांचा मोठ्या प्रमाणावर लाभ घेतला.
कार्यक्रमादरम्यान उपस्थित मान्यवरांनी एकल महिलांच्या सक्षमीकरणाचे महत्त्व अधोरेखित करत शासनाच्या विविध योजनांचा लाभ घेऊन महिलांनी आर्थिकदृष्ट्या सक्षम, स्वावलंबी आणि आत्मनिर्भर बनावे, असे आवाहन केले. तसेच समाजातील प्रत्येक घटकाने एकल महिलांच्या विकासासाठी सकारात्मक भूमिका बजावण्याची गरज असल्याचे मत व्यक्त करण्यात आले.
कार्यक्रमाची प्रस्तावना उमेदच्या प्रभाग समन्वयक सीमा शिंदे यांनी केली, तर आभार प्रदर्शन आयसीडीएस विभागाच्या स्नेहल गुप्ते यांनी केले.
महाबळेश्वर तालुक्यातील तब्बल ७९ ग्रामपंचायतींमधील स्वयंसहाय्यता समूह सदस्य, ग्रामसंघ अध्यक्ष, सचिव, कोषाध्यक्ष, प्रभाग संघाचे पदाधिकारी तसेच मोठ्या संख्येने एकल महिला या कार्यक्रमास उपस्थित होत्या. महिलांच्या सर्वांगीण विकास, सक्षमीकरण आणि सामाजिक समावेशनाचा संदेश देणारा हा कार्यक्रम उत्साहपूर्ण आणि प्रेरणादायी वातावरणात संपन्न झाला.
Comments
Post a Comment