“प्रतापगडाच्या पायथ्याशी आदिशक्तीचा जल्लोष; पारसोंड येथे श्रीरामवरदायिनी मातेचा यात्रोत्सव भक्ती, समाजसेवा आणि क्रीडांचा संगम ठरला”
प्रतापगड प्रतिनिधी :
सह्याद्रीच्या कुशीत वसलेल्या आणि ऐतिहासिक किल्ले प्रतापगड च्या पायथ्याशी असलेल्या श्रीक्षेत्र पार्वतीपूर पारसोंड (ता. महाबळेश्वर) येथे आदिशक्ती श्रीरामवरदायिनी मातेचा वार्षिक यात्रोत्सव २०२६ मोठ्या उत्साहात आणि भक्तिमय वातावरणात साजरा होत आहे. आदिशक्ती युवा प्रतिष्ठान यांच्या वतीने आयोजित या यात्रोत्सवाचे यंदा सोळावे वर्ष असून, दि. १४ एप्रिल ते २२ एप्रिल दरम्यान विविध धार्मिक, सामाजिक आणि क्रीडा उपक्रमांची मेजवानी ग्रामस्थांसह भाविकांना अनुभवायला मिळत आहे.
यात्रोत्सवाची सुरुवात १४ एप्रिल रोजी देवीच्या भव्य पालखी मिरवणुकीने, काठी उभारणी आणि महाप्रसादाने झाली. त्यानंतर १५ एप्रिल रोजी ४३ गावांतील पारंपरिक विडे वर्तवण्याचा सोहळा पार पडला. १६ एप्रिल रोजी स्वराज्य लेझीम पथकाच्या दिमाखदार सादरीकरणाने वातावरण भारावून गेले, तर मध्यरात्री पारंपरिक ‘बगाड’ सोहळ्याने यात्रोत्सवाला धार्मिक उंची प्राप्त झाली.
यात्रोत्सवात धार्मिकतेसोबतच समाजाभिमुख उपक्रमांनाही विशेष महत्त्व देण्यात आले आहे. १९ एप्रिल रोजी सकाळी किल्ले प्रतापगड ते पारसोंड अशी प्रज्वलित शिवज्योत मिरवणूक काढण्यात येणार असून, यामधून शिवभक्तीचा जागर होणार आहे. त्याच दिवशी गरजू रुग्णांसाठी मोफत आरोग्य तपासणी व रक्तदान शिबिराचे आयोजन करण्यात आले आहे.
महिला आणि बालकांसाठी विविध स्पर्धा आयोजित करण्यात आल्या असून, महिलांसाठी हळदी-कुंकू समारंभ आणि कौशल्यवर्धक स्पर्धा, तर मुलांसाठी धावणे, चित्रकला अशा स्पर्धांना उत्स्फूर्त प्रतिसाद मिळत आहे. तरुणांच्या आकर्षणाचे केंद्र ठरलेली ‘कै. सुशील सोंडकर स्मृती चषक २०२६’ क्रिकेट स्पर्धा २० व २१ एप्रिल रोजी रंगणार असून, आकर्षक पारितोषिकांमुळे स्पर्धेबाबत मोठी उत्सुकता निर्माण झाली आहे. तसेच १८ एप्रिल रोजी ‘पारसोंड प्रीमियर लीग’ (PPL) चेही आयोजन करण्यात आले आहे.
यात्रोत्सवात सामाजिक बांधिलकी जपत विविध उपक्रम राबवले जात आहेत. गरजू विद्यार्थ्यांना ‘आदिशक्ती शिष्यवृत्ती’ अंतर्गत शैक्षणिक साहित्य वाटप, तसेच महिलांना स्वावलंबी बनवण्यासाठी ‘आदिशक्ती आधार योजना’ अंतर्गत मोफत शिलाई मशीनचे वितरण करण्यात येत आहे. २१ एप्रिल रोजी ‘अकरावा आदिशक्ती गौरव पुरस्कार २०२६’ महाबळेश्वर नगरपरिषदेचे नगरसेवक संतोष (आबा) शिंदे यांना त्यांच्या उल्लेखनीय सामाजिक कार्याबद्दल प्रदान करण्यात येणार आहे.
या यात्रोत्सवाची सांगता २२ एप्रिल रोजी पहाटे छबिना, पालखी मिरवणूक आणि लळीत या पारंपरिक कार्यक्रमांनंतर महाप्रसादाने होणार आहे. संपूर्ण उत्सवाचे नियोजन आदिशक्ती युवा प्रतिष्ठानचे पदाधिकारी आणि ग्रामस्थ मोठ्या उत्साहाने करत असून, “उत्सवाच्या निमित्ताने समाजसेवा” हा वारसा जपत सर्व भाविकांना सहभागी होण्याचे आवाहन करण्यात आले आहे.
पारसोंड येथे भरलेला हा यात्रोत्सव केवळ धार्मिक सोहळा न राहता समाजएकता, परंपरा आणि आधुनिक सामाजिक जाणीव यांचा संगम ठरत असल्याचे चित्र पाहायला मिळत आहे.
Comments
Post a Comment