कुंभरोशी गणात अपक्ष उमेदवार समीर चव्हाण यांची प्रचारसभा उत्साहात; चतुरबेट येथील मंदिरात ग्रामस्थांची मोठी उपस्थिती

कुंभरोशी गणात अपक्ष उमेदवार समीर चव्हाण यांची प्रचारसभा उत्साहात; चतुरबेट येथील मंदिरात ग्रामस्थांची मोठी उपस्थिती

कुंभरोशी प्रतिनिधी–

पंचायत समिती महाबळेश्वर अंतर्गत कुंभरोशी गणासाठी चतुरबेट येथे अपक्ष उमेदवार समीर चव्हाण यांची प्रचारसभा उत्साहात पार पडली. गावातील मंदिर परिसरात झालेल्या या सभेला ग्रामस्थांनी मोठ्या संख्येने उपस्थिती लावली असून प्रचार शिगेला पोहोचल्याचे चित्र पाहायला मिळाले. समीर चव्हाण यांनी यावेळी स्थानिक प्रश्नांवर सविस्तर भाष्य करत नागरिकांना निर्भीडपणे मतदान करण्याचे आवाहन केले.

सभेत बोलताना चव्हाण यांनी पाणीटंचाई, रस्त्यांची दुरवस्था, आरोग्य सेवा, शिक्षणाच्या सुविधा, तरुणांचा रोजगार आणि शेतीविषयक अडचणी या मुद्द्यांवर ठोस भूमिका मांडली. गावागावातील मूलभूत सुविधांचा अभाव, योजनांची अंमलबजावणी होत नसल्याची स्थिती आणि लोकप्रतिनिधींचा जनतेपासून वाढलेला दुरावा याकडे त्यांनी लक्ष वेधले. पंचायत समिती सदस्य म्हणून निवडून आल्यास सर्व घटकांना सोबत घेऊन पारदर्शक आणि लोकाभिमुख कारभार करण्याचा निर्धार त्यांनी व्यक्त केला.

अपक्ष उमेदवार म्हणून कोणत्याही दबावाशिवाय केवळ जनतेच्या प्रश्नांसाठी काम करणार असल्याचे सांगत चव्हाण यांनी महिलांसाठी पाणी, आरोग्य आणि स्वयंपूर्णतेचे उपक्रम, तरुणांसाठी कौशल्यविकास व रोजगाराच्या संधी, तसेच शेतकऱ्यांसाठी सिंचन व बाजारपेठेशी जोडणी यावर विशेष भर देण्याचे आश्वासन दिले. पर्यटन क्षेत्राचा विकास करताना स्थानिकांना थेट लाभ मिळेल, यासाठी पंचायत समिती पातळीवर पाठपुरावा करण्याचे त्यांनी स्पष्ट केले.

यावेळी उपस्थित ग्रामस्थांनीही आपल्या समस्या आणि अपेक्षा मोकळेपणाने मांडल्या. गावाच्या विकासासाठी खऱ्या अर्थाने काम करणारा प्रतिनिधी मिळावा, अशी भावना अनेकांनी व्यक्त केली. सभेच्या शेवटी समीर चव्हाण यांनी सर्व मतदारांना मतदानाच्या दिवशी मोठ्या संख्येने बाहेर पडून अपक्ष उमेदवाराला संधी देण्याचे आवाहन केले. चतुरबेट येथील या सभेमुळे कुंभरोशी गणातील निवडणूक प्रचाराला अधिक वेग आणि उत्साह मिळाल्याचे स्पष्ट झाले.